Psalms 58

A niaring pire God upi na vakadik ra umana tena pait ra kaina

Kai nina i lue ra kakailai; a tiun Al-Tasket; a Miktam kai David.

1Avat a umana ngalangala, a dovot ava varkurai takodo?
Dave, ava kure vadovot vang ra umana natu i ra tarai?
2Pata, ta ra bala i vavat ava nuk upi ra varpiam,
A lima i vavat i tibe ra rakarakan a gunagunan ma ra mangamangana vinarubu.

3A umana tena varpiam dia vana rara; di kava diat damana.
Ba di kava diat dia vana rara muka, ma dia vavaongo.
4Kadia taring i da ra taring na vui;
Dia da ra kaina vui a vaut, nina i tabonot ra talingana,
5Ma pa i torom ta ra nilai ra tena vamaram vui,
Ma ona i mal bulu kana papait, pa i torom bula.

6God, una rubat bubur ra pal a ngie i diat,
Luluai, una rubat vue ra ngala na pal a ngie i ra umana leon.
7Boina diat a panie da ra tava i ulur;
Ba i al vaninare kana pu, boina ba na da i tabubur.
8Boina ba diat a da ra demdem nina i polo ko ma i panie;
Ma da ra bul ba ra vavina i kava pit ia, ma pa i gire ra keake.
9Kavava umana kabala pa dia malamalapang boko,
Ma ba ra kirip i kalamana boko, a kulot na kap vue diat ma ra kalivuvur.

10A tena takodo na gugu ba i gire ra varobo;
Na puk ra kauna ta ra gapu i ra tena varpiam.
Ma ra tarai diat a biti: A dovot di vabongon ra tena takodo;
A dovotina tika na God go kari ma i pait ra varkurai ta ra gunagunan.
11